hikayat prang sabi jiled 1 bab 1

waquljaa al haqqu wazahaqal bathil
innan batilah kana zahuqaaa

hikayat prang sabi jilid 1
==================
annisa 74,al anfal 61,65
attaubah 112


mukaddimah prang sabi jiled 1

alhamdulillahi rabbil alamin
pujo mukmin keu tuhan sidro
seulawet salem ateuh mursalin
beutayakin adun ado

amma bakdu hai tgk jroh
nyoe na saboh bungong jaro
pusaka jameun treb ka gadoh
sang ka teubeh keuneubahnyo

bahle jino lon puwoe roh
bah lon sateh wahe ado
keudeh keuno lon meu urooh
lon jak waweh jep jep nanggro

puh meuteumeng keuneubah jroh
habeh lon pleh jep jep sago
habeh lon jak timu baroh
lon jak seutet hikayat nyo

nyoe keuh baro troh ban hajat
meutuwah that bungong jaro
kabar zaman treb ka leubeh
po seunurat ureng meuso

bhah prang sabi yang suci that
bak berjihat peuthen nanggro
bah le jino lon peusapat
bah lon surat deungen jaro

supaya jet keu ibarat
rakan sahbat dalam nanggroe
pakri hukom ta ek lam prang
pu peunulong uro dudo

habeh bandum sinan katrang
takheun rijang adun adoe
Allah allah hai meutuwah
coba peuhah asoe peuto

tacok keudro dum faedah
ban penegah hikayat nyoe
yang keumarang hai meutuwah
syit that meugah payong nanggroe

tgk di tiro yang le syaukah
yang that gagah peutheun nanggroe
meunan teuseubot bak silsilah
aleh syit sah yu tgk nyoe

sabab rame yang keumarang
lam masa prang yoh saboh roe
le that ulama panglima prang
pogurangang ureng nanggroe

mangat maju bak pinto prang
geujak lawan kafe pundo
bek teumakot nyawong hilang
bek le sang keu donya nyoe

lam donya nyoe soe tem muprang
geubri bintang uroe dudo
ainul mardhiah tuhan pulang
darabaro prang lam meuligo

njan keuh judo muda seudang
fahlawan prang peutheun nanggroe
allah allah hai meutuah
ban peuneugah beutapako

seubab khabar ken beurakah
fireuman Allah geuhareuto
hadist nabi rasulullah
tapateh sah hai sam lako

bek syok hate hai meuh meuntah
suroh allah peutheun nanggroe
bah keh oh no yang khuteubah
paham beujadeh wahe ado

punoh syukor lon keu Allah
beumeutuwah so yang pako
Abdullah aref habeh kisah
tulong allah tuhan sidro

neupeu ampon bakyang salah
neupeu meu ah dua nanggroe


ayat ayat prang sabi
anfal 65
taubah 112
ali imran 168,169
annisa 74
anfal 61


hikayat prang sabi jiled 1

bismillahirrahmanirrahim

alhamdulillahi khalikul asy yak
dum peukara paneujeut rabbi
arasy kursi syurga nuraka
langet donya dum beurangri

kemudian seulawet salem haluan
ateuh jonjongan penghulu nabi
ateuh wareh ssahbat sajan
sekalian muhajir anasari

ohlheh pujo seulawet sudah
nyoe hadia hamba faki
tulong tuhan insyaAllah
lon meng peugah khabar prang sabi

khabar kitab lon meung karang
ssuroh cut abang ubak kami
lumpo ateuh kebajikan
mudah mudahan fahla tuhan bro

jet faedah seigala taulan
wareh rakan dum beurangri
geulanto lon bri kreh meudulong
badal lon pulang krong meuriti

badal tumpok pucok keurawang
badal keunarang intan pudi
tetapi yang na jet subeuhat
lon seumurat golom meukri

beutaht meunan pih lon surat
keu ibarat dumna akhi
jika lee krot dengen salah
bek neumarah keu hamba faki


lon surat nyo liwajhillah
karna allah ken beurangkari
geulanto lon bri bu lam hidang
misal ija plang dalam peti

wahe tgk adek abang
riwang bak prang dumna akhi
jak prang sabi jino rijang
bek le linteng kanan kiri

bek ta ingat keu ule balang
kajipasang le jen pari
wahe tgk cut donyaka akhe
agama tan le seugala neugri

bandum ulama narit tanle
keuprang kafe hana peudoli
gadoh akai dum habeh kle
tan le hire but prang sabi

melingkan yang na ngen izin poe
tgk syik di tiro teuladan nabi
ulama laen jep jep nanggroe
peuseungap dro tan peudoli

bak geukira ek lheh dro
uroe dudo wate geusudi
uroe meuhadap ngen po tallah
hana ret glah hai sayyidi

dalam kitab meuna geupeugah
fireuman allah hadis nabi
hai tgk cut adoe sahbat
fireuman hadarat tuhanku rabbi

seugala na dum ibadat
yang leubeh that tajak prang sabi
lafad hadis tan lon baca
makna saja lon boh sini

keupeu ingat jaga jaga
kadang lupa dumna akhi
wahei tgk beuget tapham
ken lon reusam hana meukri

khabar lon nyoe lam kuruan
ken hai rakan han mene ne
dalam kuruan kana ayat
fireuman hadarat tuhan ku rabbi

sereuta hadis saidil ummah
bek lupa that wahai akhi
hadis nabi syit that saheh
hana ret weh bak prang sabi

neubri bulong han pudaleh
syit kateupreh syurga negri
meunan meuteumeng jep jep kitab
fireuman hadarat yang that suci

tadeungeu tgk lon baca ayat
penghulu ibadat syit prang sabi
attaubah 112

meuthat tajdhim hai samlako
neublo gata le rabbul karim
jannatunna'im keu yum geubri
soe yang na jok nyawong harta
keupeubeulanja bak prang sabi

neublo le po meuhal harga
dengen syurga neutuka sabi
njan keh keuyum neubri le Allah
badai payah yoh di sini
meunan janji po tallah
hai meutuwah bek le sangsi

taurat injil ngen kuruan
hinan tuhan neukeubah janji
bekthat galak meunegah donya
keuagama tan padoli

bahle tameukat intan mutiara
publo kkeu raja rabbul jalil

haitgk cut adekboh hate
bek ta weuh le keudonya ini
tatung laen yang meusampe
puas that hate punulong rabbi

wahe raja cut adoe meutuwah
hina ngen meugah bandum sabi
wahe raja seugala kawom
geutanyoe mandum wajeb mati

meuseuki raja di nanggroe rum
yang ek hukom dum seugala bi
beurangho tajak wahe sahbat
wajeb meuhat syit ta mati

seperti ban fireuman hadharat
dalam ayat taeu daher
meuthat talop lam kuta beuso
jadeh syit ado gata mati

njankeuh lon kheun po samlako
ingat keudro dum teuh sare
soe leubeh lom nabi muhammad
penghulu umat kasyit tan le

neuwoe bak tuhan rabbul izzah
tung ibarat yang boh hate

hai raja cut tgk meutuwah
inong ceudah bahle disini
tatung laen ainulmardhiah
sang meh meuntah yang palet gaki

jipinggang ija tujoh lapeh
cuaca beuteh zahir teujali
neupeujet nibak nur yang puteh
inan keuh meuceh asai sinyak ti

hai adoe cut pike beu trok
bek that dawok ngen donya ini
bahle tinggai sikin meupucok
pedeng meutampok bahle disini

hai tgk cut bungong tanjong meh
bek le taweuh keu donya ini
tatik u likoy bah beulheh lheh
jak eu beudeuh syurga tinggi

hai tgk cut po samlako
umu nanggroe hana treb le
janji tuhan yoh saboh roe
kakeuh sampo hai boh hate

yoh goh neugulong langet donya
le that tanda ta eu lahe
jitren dajjal dalam donya
njan pih kana han pu syok le

meunyeu katroh njan syit mate
hana guna berangpu le
keupu guna ta ibadat
tuhan hadarat han neutungle

tanle gunan wahai sahbat
pinto taubat ka gugunci
yoh goh teutop pinto taobat
jino takarat hai boh hate

yoh golomtren malaikat
suroh hadarat nyawong cre
yoh goh geucokke tak tentu
jok beumeuhat bek sayangle

tajok pulang bak hadarat
beukhales that niat lam hati
hai tgk cut rakan sahbat
tung ibarat hai boh hati

nabi geutanyoe penghulu ummat
yang bri syafaat uroe page
kasyit neuwoe bak hadarat
rabbul izzah yang yu panggel

njan keuh lon kheun wahe sahbat
tung ibarat hai boh hati
wahe tgk meunyeu meunan
bah le sinan hudep mati

bek sayangle kampung halaman
bah le sinan bek taweh le
aneuk ngen judo bah le sinan
hai budiman bek sayangle

jak tung laen yang sambino
tujoh poh dro sabe sabe
ureng di luwa ka geumuprang
dum si barang hana weuh le
harta ngen nyawong dum sibarang
geutik lam prang khaliis hati


digeutanyoe hai syedara
syok2 sangka talawan kafe
bandum tuhan neubri keugata
paken bentara syok lam hate

ya Allah wahidon kahhar
yang ghaffar tuhanku rabbi

neubri teutap hate hamba
bak prang beulanda kafe harbi
wahe tgk cut adoe meutuwah
bek le dahsyah taduk sabe

rakyat fengfo nanggro susah
jipeurintah oleh kafe
yang keujet jino woe bak allah
nyawong ta seurah hudep mate

nyawong ngen tuboh jok keu allah
darah gapah dum seugala bi
fa iza jaa a ajaluhum
makna meufhom dum teuh sare

laa yastak khiruuna sa 'aton
oh trok ban jan han udep le
teuman walaa yastakdimun
awai nibak njan pih han mate

coba ingat hai bangsaloen
keupu intan cahya meuble ble
kaman meunyeu peuneujet tuhan
jen ngen insan mandum mate

akan teutapi hana meujan
but di tuhan han troh pike
ingat beutroh wahe taulan
laen bak tuhan bandum mate

beurangpu pu wahe rakan
meuken ngentuhan han meusampe
tip tip tagaseh laen bak tuhan
siat han jan kahanale

kadang tingat galak teuh that
han tatupat oh wate cree

mise nyawong tagaseh that
jan troh bak had han jet theun le
dumho taplung rata teumpat
malaikat keunan troh le

meunyeu meunan wahe abang
riwang bak prang bek lale le

nibak mate di ret di bang
bahle bak prang sinan meugule
meunyeu mate dirumoh inong
han pu tanyeng meukrit sabe

saket teuh that geucok nyawong
meuken keuneng ssenjata kafe
bah lam seh prang meubantau ateng
bah teugageung bak tapoh kafe

hai tgk cut adoemeutuwah
bek le dahsyah taduk sabe
meunye na hajat ainul mardiah
beudeuh langkah bak prang sabi

hadis pang ule rasulullah
gata han reubah oh keuneng beude
meuken lam leumong ainul mardhiah
han lom reubah hai boh hate

meugolom troh po sambino
manteng geutanyoe teuduk sabe

troh samlako jak then jaro
baro samlako rebah meugule
meudiloe diloe jak then jaro
jak cok lajo jipuwoele

oh troh lam leumong po sambino
nyawong geutanyoe jiteubitle
jiteubit nyawoeng alhamdulillah
masyaAllah hanjet kheun le

malengkan yang the ssidro allah
badai payah ureng prang kafe
wahe tgk ulee balang
bek le bimbang ta im sabe

ureng syahid didalam prang
bek hai rakan ta geukhen matee
beuthat ta le ta eu rupa
bek tasangka gop njan mate

fireuman tuhan syit deh nyata
bek syok sangka hai boh hate
wala tahsabannallazi kutiluu
bek hai tgk takheun mate

fisabilillahi amwaata
bal ahyaa on hudep sabe
'inda rabbihim yurzakun
munafek kheun nyoe bit mate

meuthat ta eu nyawong katan
bek hai rakan takheun matee
gob njan hudep nibak tuhan
lam sukaan han jet kheun le

njandum syahid nibak tuhan
teh teuladan yang na sabe
teuh yang saboh yang san ngen njan
hai tauladan coba pike

wahe tgk cutpoe bentara
hai sodara bek taduk lee
nyawong tuboehh ngen hareuta
peubeulanja keu prang sabi

krueng kal kausar indah sangat
bulung muhammad karunya rabbi
dipang ule neubri keu ummat
yang na khitmah bak prang sabi

jep si teugok rasa laen
lezat maken hanjet kheun kri
keu peurumoh bintang canden
rupa licen budiadari

tujoh ploh dro yang kideumah
rupa jroh that hana sakri
tanging manteng kaseb lezat
hanpu tamat deungen jari

mandum bulueng neubri le allah
hai meuruwah jak prang sabi
bek le taduk nanggroe susah
woe bak allah yangthat suci

bah le tiggai inong ceudah
bah ta keubah yangbu basi
woe bak judo ainul mardhiah
yang that indahbu khanduri

keu inong jroh bek le ta syeen
jak cok laen yang jauhari
bahle keudeh ta meukawen
yang that canden budiadari